“ASAN xidmət” “VFS Global iConnect 2024” tədbirində
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndə heyəti Birləşmiş Ərəb Əmirliklərinin paytaxtı Abu-Dabidə keçirilən “VFS Global iConnect 2024” tədbirində iştirak edib.
“iConnect” viza, pasport xidmətləri və sərhəd nəzarəti sektorunda fikir mübadiləsi aparmaq, yeni tendensiyaları müzakirə etmək üçün nəzərdə tutulur. Sözügedən unikal platformada dünyanın bir çox yerindən özəl sektor və hökumət rəsmiləri bir araya gəlirlər
“VFS Global” şirkətinin təşkilatçılığı ilə baş tutan forumun builki mövzusu innovasiyalar vasitəsilə sərhədlərarası mobilliyin artırılması, rəqəmsallaşmanın və inkişaf edən texnologiyaların təhlükəsiz və kəsintisiz təsiri olub. Panel müzakirələrdə texnologiya əsaslı innovasiyalar, süni intellektin potensialı, kibertəhlükəsizlik və məlumatların mühafizəsi ilə bağlı təcrübələr diqqətə çatdırılıb.
Dövlət Agentliyinin “İnnovasiyalar Mərkəzi”nin direktoru Vüsal Rüstəmov 60-dan çox dövlətin 150-dən çox nümayəndəsinin iştirak etdiyi forumda “ASAN Viza” sistemi haqqında ətraflı məlumat verib və onun müasir texniki standartlara uyğun imkanlarından bəhs edib.
151 ölkədə 3388 müraciət mərkəzi ilə fəaliyyət göstərən “VFS Global” şirkəti 2001-ci ildən 282 milyondan çox müraciəti və 2007-ci ildən bu günə qədər isə 132,56 milyondan çox biometrik qeydiyyatı uğurlu şəkildə emal edib.
Xatırladaq ki, “ASAN Viza” sistemi Azərbaycan Respublikasının Prezidentinin 2016-cı il 1 iyun tarixli 923 saylı “Elektron vizaların verilməsi prosedurunun sadələşdirilməsi və “ASAN Viza” sisteminin yaradılması haqqında” Fərmanı ilə yaradılıb. Sistem vasitəsilə əcnəbilər və vətəndaşlığı olmayan şəxslər standart elektron vizanı 3 iş günü, sürətləndirilmiş qaydada isə 3 saat ərzində əldə edə bilər. Fəaliyyətə başladığı dövrdən “ASAN Viza” sistemi vasitəsilə hava limanında rəsmiləşdirilən vizalar daxil olmaqla, ümumi 3.3 milyondan çox vizanın rəsmiləşdirilməsi həyata keçirilib.
20-21 aprel 2024-cü il tarixində Türkiyənin Antalya şəhərində “Robotex” festivalının yarımfinal mərhələsi təşkil olunub.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “Bilim Bakı” mərkəzinin şagirdləri növbəti uğura imza atıblar.
250-dən çox komandanın iştirak etdiyi yarışda mərkəzin “DENEYAP” texnologiya laboratoriyasının "Creators" komandası “Sağlamlıq elmləri və texnologiyaları” kateqoriyası üzrə 3-cü yerin qalibi olub. "Turantech" komandası isə “Lego xəttinin təqibi” kateqoriyası üzrə münsiflər heyətinin xüsusi mükafatına layiq görülüb.
Qalib komandalar İtaliyanın Roma şəhərində keçiriləcək final mərhələsində iştirak hüququ qazanıblar.
Estoniyada əsası qoyulan “Robotex” festivalı dünyanın ən böyük robot yarışması hesab edilir. “Robotex Türkiyə”də dünyanın 11 ölkəsindən 19 fərqli kateqoriya üzrə 400-dən çox komanda, 2 500-dən artıq iştirakçı yarışıb.
Xatırladaq ki, "Bilim Bakı" mərkəzi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və Türkiyə Texnologiya Komandası Fondunun əməkdaşlığı ilə yaradılıb. Məqsəd 6 -14 yaşlı şagirdlərin texnologiya, innovasiya, elm və sahibkarlıq sahəsində bilik və bacarıqlarını inkişaf etdirmək, onlara məktəbdə öyrədilən anlayışları tətbiqi təlimlər vasitəsilə əyani nümayiş etdirmək, gündəlik həyatda elm və texnologiyanın ekvivalentini göstərmək və nəzəriyyəsi məlum olan elmi hadisələrin praktikada necə işlədiyini müşahidə etmək imkanlarını yaratmaqdır.
Ölkəmizdə səfərdə olan Rumıniya Hökumətinin Baş katibi Mirçea Abrudeanın rəhbərlik etdiyi nümayəndə heyəti “ASAN xidmət” mərkəzinin fəaliyyəti ilə tanış olub.
Dövlət Agentliyinin sədri Ülvi Mehdiyev qonaqlara “ASAN xidmət” modelinin yaradılması məqsədləri, habelə dövlət xidmətləri sahəsində həyata keçirilən müxtəlif layihələr barədə ətraflı məlumat verib.
Qonaqlar həmçinin Səyyar ASAN xidmətin, 108 Çağrı Mərkəzinin, "INNOLAND" İnkubasiya və Akselerasiya Mərkəzinin, ASAN İnnovativ İnkişaf Mərkəzinin, “ABAD”ın, “Bilim Bakı”nın və "ASAN TV və Radio"nun fəaliyyəti ilə tanış olublar.
Nümayəndə heyətinə dövlət xidmətlərinin dizaynı və müvafiq sahədə tətbiq olunan innovativ həllər barədə də geniş təqdimat edilib.
Qonaq “ASAN xidmət” modeli ilə yerində tanışlıqdan məmnun olub və hazırda Rumınıyada dövlət xidmətləri sahəsində oxşar modelin olmadığını bildiririb.
Baş katib “ASAN xidmət” təcrübəsinin ölkəsində tətbiqi ilə bağlı qısa müddətdə anlaşma memorandumunu imzalamaq niyyətində olduqlarını vurğulayıb.
Səfər zamanı rumıniyalı qonaq “ASAN TV və Radio”ya müsahibə verib.
Xatırladaq ki, cari ilin fevral ayında Birləşmiş Ərəb Əmirliklərində keçirilmiş 11-ci “Dünya Hökumətlər Sammiti”ndə Rumıniya Hökumətinin Baş katibi ilə Dövlət Agentliyinin sədri arasında görüş keçirilib və əməkdaşlıqla bağlı ilkin razılığa gəlinib.
Lənkərən regional "ASAN xidmət" mərkəzində ASANçıların Novruz festivalı baş tutub.
Tədbirdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin sədri Ülvi Mehdiyev, Lənkəran Şəhər İcra Hakimiyyətinin başçısı Taleh Qaraşov, "ASAN xidmət" əməkdaşları, rayon ictimaiyyətinin nümayəndələri, digər qonaqlar iştirak ediblər.
Festival çərçivəsində "ASAN xidmət" mərkəzlərinin, eləcə də Lənkərana xas olan mətbəxin, çay və meyvəçilik təsərrüfatlarının, folklor nümunələrinin təqdimatları baş tutub.
Həmçinin festivalda xalq folklor kollektivinin ifası, müxtəlif idman hərəkətləri, kəndir şousu nümayiş etdirilib.
Qonaqlar xalqımızın ən qədim bayramlarından olan Novruz münasibətilə iştirakçıları təbrik edib, xoşbəxtlik və sevinc arzu ediblər.
Festival konsert proqramı ilə davam etdirilib.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin, “Bilişim Vadisi Bakı”nın və “SAHA Robotics” şirkətinin birgə təşkilatçılığı ilə keçirilən “RoboCode” robotik kodlama düşərgəsi başa çatıb.
Bağlanış tədbirində “İnnovasiyalar Mərkəzi”nin direktoru Vüsal Rüstəmov, “Bilişim Vadisi”nin baş icraçı direktorunun müavini Tuba Öztepe, “Bilişim Vadisi Bakı”nın direktoru Qamət Kərimov, “SAHA Robotics” şirkətinin vitse-prezidenti və Azərbaycan üzrə meneceri Eray Çobanoğlu, düşərgə iştirakçıları və digər qonaqlar iştirak ediblər.
Düşərgə müddətində formalaşan 9 komandadan final mərhələsinə keçən 3 komandanın hazırladığı prototiplər münsiflər heyəti tərəfindən qiymətləndirilib.
Nəticələrə əsasən “Difai” komandası 1-ci, “eRRobotX” komandası 2-ci, “RookieBots” komandası isə 3-cü yerə layiq görülüb.
Sonda qalib komandalara mükafatlar təqdim olunub.
Qaliblər həmçinin “Bilişim Vadisi” kampusunda və “SAHA Robotics” şirkətində təcrübə keçmək imkanları qazanıblar.
1 ay davam edən düşərgədə qeydiyyatdan keçən 448 müraciətçidən kriteriyalara uyğun olaraq seçilmiş 90 nəfərinə “ROS'un əsasları” , “Robotların simulyasiya edilməsi”, “Robot hərəkət sistemləri” və s. mövzularda onlayn və fiziki təlimlər keçirilib.
Strateji tərəfdaşlar: "Azersun Holding", Coffee'nJOY”.
Naxçıvan Dövlət Universitetində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi və Asiya İnkişaf Bankının birgə həyata keçirdiyi “Yerli Texnoloji Startapların İnkişafının Təşviqi” layihəsi çərçivəsində görüş keçirilib.
Universitet rəhbərliyi ilə keçirilən görüşdə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nümayəndə heyəti iştirak edib.
Görüş zamanı Naxçıvanda baş tutacaq "StartupFest" haqqında müzakirələr edilib. Həmçinin, “İnnovasiyalar Mərkəzi” tərəfindən həyata keçirilən “Gələcək üçün bacarıqlar” layihəsi haqqında da ətraflı məlumat verilib. Qeyd olunub ki, “Gələcək üçün bacarıqlar” layihəsinin məqsədi innovasiya sahəsində kadr potensialının artırılması, təhsildə innovasiya fəaliyyətinin dəstəklənməsi, innovativ ideyalarını inkişaf etdirmək üçün təhsil prosesində tələbələrə dəstək göstərilməsi və tələbələrin ölkənin texnoloji inkişafında önəmli rol oynayan kəşf, ixtira sahəsinə yönləndirilməsidir.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "İnnovasiyalar Mərkəzi" "Bilişim Vadisi" ilə birgə “Gələcək üçün bacarıqlar” layihəsi çərçivəsində inkubasiya proqramına start verir.
Məqsəd ölkəmizdə innovasiya fəaliyyətinin davamlılığının təmin edilməsi, innovativ ideyaların inkişaf etdirilməsi üçün tələbələrin innovasiya və startap üzrə biliklərinin inkişafıdır.
Proqrama “Gələcək üçün bacarıqlar” layihəsinin öncəki infosesiyalarla seçilmiş tələbələri, startap yaratmağa, innovativ yeniliklər etməyə meyilli, özünə güvənən, gələcəyini bu sahədə görən gənclər və komandalar qoşula bilərlər.
19 mart tarixinə qədər aşağıdakı linkə daxil olmaqla qeydiyyatdan keçmək olar: https://forms.gle/gTH9jvSLbJDgBX3e7
“Gələcək üçün bacarıqlar” layihəsinin məqsədi innovasiya sahəsində kadr potensialının artırılması, təhsildə innovasiya fəaliyyətinin dəstəklənməsidir.
Ümumilikdə layihə çərçivəsində 2000-dən çox tələbənin 181 startap ideyası təqdim olunub. Bu çərçivədə universitetlərdə mentor kimi hazırlanmış 130-dan çox müəllimin dəstəyi ilə 98 startap komandası formalaşdırılıb.
2-3 mart 2024-cü il tarixində Bakı İdman Sarayında Naxçıvan Dövlət Universitetinin və “Robotex Türkiyə”nin birgə təşkilatçılığı ilə “Robotex Azərbaycan Avrasiya Çempionatı” təşkil olunub.
Tədbirdə 6 universitetin, 41 məktəbin, 10 özəl müəssisənin 250-dən çox komandası, 1500-dən çox iştirakçı, 5000-dən çox qonaq iştirak edib. Komandalar 18 kateqoriyada 4 yaş qrupunda yarışıb.
Çempionatda Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “Bilim Bakı” mərkəzinin 7 komandası müxtəlif kateqoriyalar üzrə qalib seçilib.
Belə ki, mərkəzin "O-Line" komandası “Lego Xəttinin Təqibi” kateqoriyası üzrə 1-ci yerin, "MMR" komandası isə 2-ci yerin qalibi olub. "Karanlığın yıldızları", "Turan Tech" və "DİS Robot” komandaları isə münsiflər heyətinin xüsusi mükafatı ilə təltif olunub.
“RoboLig” kateqoriyası üzrə “Kings” komandası, “Sağlamlıq elmləri və texnologiyaları” kateqoriyası üzrə isə “CREATORS” komandası 3-cü yerin qalibi olub.
Festivalda dərəcə göstərən komandalara kubok və sertifikatlar təqdim olunub.
“Bilim Bakı” mərkəzinin qalib komandaları ölkəmizi Antalyada keçiriləcək yarımfinal mərhələsində təmsil edəcək.
“Robotex Azərbaycan Avrasiya Çempionatı” regionun ən parlaq zəkalı gənclərini təhsil və texnologiya sahəsində bir araya gətirir, onlara bilik və bacarıqlarını beynəlxalq səviyyədə sınamaq və nümayiş etdirmək imkanı verir.
Xatırladaq ki, "Bilim Bakı" mərkəzi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin və Türkiyə Texnologiya Komandası Fondunun əməkdaşlığı ilə yaradılıb. Məqsəd 6 -14 yaşlı şagirdlərin texnologiya, innovasiya, elm və sahibkarlıq sahəsində bilik və bacarıqlarını inkişaf etdirmək, onlara məktəbdə öyrədilən anlayışları tətbiqi təlimlər vasitəsilə əyani nümayiş etdirmək, gündəlik həyatda elm və texnologiyanın ekvivalentini göstərmək və nəzəriyyəsi məlum olan elmi hadisələrin praktikada necə işlədiyini müşahidə etmək imkanlarını yaratmaqdır.
Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovativ İnkişaf Mərkəzinin təşkilatçılığı ilə Ümummilli lider Heydər Əliyevin 100 illik yubileyinə həsr olunmuş “Peşəkar 100 il” idarəçilik marafonu başa çatıb.
2 ay boyunca davam edən marafon çərçivəsində ASAN İnnovativ İnkişaf Mərkəzi tərəfindən 100 nəfərdən artıq işgüzar şəxsə ödənişsiz şəkildə idarəçilik təlimləri və ustad dərsləri keçirilib.
Məqsəd bütün sahələrdən olan gənc sahibkarlar və menecerləri Ulu öndərin zəngin idarəçilik təcrübəsinin çevik, strateji və innovativ tərəfləri barədə məlumatlandırmaq, onun uzaqgörən siyasətinin ən mühüm komponentlərindən biri olan Azərbaycanın yüksək idarəetmə qabiliyyətinə malik güclü kadr potensialının formalaşmasına dəstək olmaqdır.
Marafonun açılış tədbiri Azərbaycan Respublikası Baş nazirinin müavini Əli Əhmədovun, Milli Məclis Sədrinin birinci müavini Əli Hüseynlinin, Ailə, Qadın və Uşaq Problemləri üzrə Dövlət Komitəsinin sədri Bahar Muradovanın və Türk Dövlətləri Təşkilatının Ağsaqqallar Şurasının üzvü Həsən Həsənovun iştirakı ilə baş tutub.
ASAN İnnovativ İnkişaf Mərkəzi Mərkəzi "İnnovasiyalar Mərkəzi"nin təşkilatçılığı ilə yaradılıb. Mərkəzin əsas məqsədi qabaqcıl ASAN təcrübəsini, eyni zamanda innovativ və yeni təlim metodlarını tətbiq etməklə ölkəmizdə gənclərin işsizlik problemlərinin həllinə, yüksək ixtisaslı kadrların hazırlanmasına, həmçinin müxtəlif özəl və dövlət orqanlarında kadrların peşəkarlıq səviyyəsinin təkmilləşdirilməsinə müsbət töhfələr verməkdir.