Azərbaycan 500 ASAN Startap Proqramı
24 noyabr 2020-ci il tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi ilə “500 Global” şirkəti arasında əməkdaşlığa dair memorandum və Azərbaycanda startapların inkişafı üzrə proqramların həyata keçirilməsi ilə bağlı müqavilə imzalanıb. Müqaviləyə əsasən həyata keçirilən “Azərbaycan 500 ASAN Startap Proqramı” - Azərbaycanda startapların inkişafı, vençur maliyyəşməsinin təşəkkülü üzrə proqramların həyata keçirilməsini nəzərdə tutmuş bir çox onlayn və oflayn tədbirlərdən ibarət olan inkubasiya proqramı olub "500 Global" şirkəti tərəfindən həyata keçirilib və təlimlər şirkətin beynəlxalq mentorları tərəfindən aparılıb.
Proqram müddətində iştirakçılar “Startap quruculuğu və komanda formalaşması”, “Startup booster”, “Müştəri və bazarın təhlili” və “Prototipin hazırlanması və təkmilləşdirilməsi” kimi fərqli mövzularda bir sıra təlimlər və sessiyalarda iştirak ediblər.
Nəticədə “Azərbaycan 500 ASAN Startap Proqramı”nı müvəffəqiyyətlə başa vuran 10 startap komandası - “Tinyworks”, “Uniforius”, “Medicall”, “Skaut”, “Taskilled”, “ReTrip”, “Rihand”, “Talant.az”, “Booknote” və “QMS” layihənin sonunda iştirakçılara öz layihələrini təqdim ediblər.
InnoKlub
“İnnoklub” - startapların və innovasiyalı müəssisələrin inkişafını stimullaşdırmaq, effektiv koordinasiyanı təmin etmək, ekosistem oyunçularına dəstək tədbirlərini genişləndirmək və yerli startaplara investisiya imkanlarını artırmaq məqsədilə yaradılıb.
"İNNOKLUB" ekosistemin əsas oyunçuları olan “İnnovasiyalar Mərkəzi”, “NextStep”, “Yeni Fikir”, “Lotfi Zadeh Texnologiya Mərkəzi”, “New Space”, "IBA İnnovasiya Mərkəzi”, “Tech.az”, “Technovate”, “PAŞA Holding” şirkətlərinin təşəbbüsü ilə yaradılıb.
“İNNOKLUB” üzvlərinin fəaliyyətini əlaqələndirmə və katiblik funksiyasını “İnnovasiyalar Mərkəzi” yerinə yetirir.
Tech Diaspora/İnnovasiyalar Evi
“Tech Diaspora” - yerli startapçıların ölkəmizin hüdudlarından kənarda yaşayan azərbaycanlı startapçılarla əlaqələndirilməsi və onların qlobal bazara çıxış imkanlarını artırmaq məqsədilə yaradılıb.
İlkin olaraq bu məqsədlə San-Fransisko şəhərindən Qərib Mehdiyev və Emin Şərifov, Berlin şəhərindən Nail Vəliyev və Bakı şəhərindən Məmməd Kərimov olmaqla 4 nəfərdən ibarət təşkilat komitəsi, həmçinin Azərbaycanda və dünyanın bir sıra ölkələrində yaşayan həmyerlilərimizdən ibarət 20 nəfərlik təşəbbüs qrupu yaradılıb. Təşəbbüs qrupuna “INNOLAND” və “Next Step” administrativ dəstək göstərir.
Layihə Azərbaycanda startap ekosisteminin inkişafı, dünyanın müxtəlif ölkələrində yaşayan azərbaycanlı startap ekosistem oyunçularının, innovativ texnologiyalar sahəsində fəaliyyət göstərən azərbaycanlıların ölkəmiz ilə əlaqələrinin daha da möhkəmləndirilməsi, onlar arasında əlaqələrin və birgə fəaliyyətin təmin olunmasını hədəfləyib.
“Tech Diaspora”nın nümayəndəlikləri ilkin olaraq startap ekosisteminin inkişaf etdiyi Bakı, Berlin və San-Fransisko şəhərlərində fəaliyyətə başlayıb.
“İnnovasiyalar Evi” - ölkəmizdəki startapçıların Silikon Vadisinə getmələrinə, təcrübə qazanmalarına və öz startaplarını inkişaf etdirmələrinə dəstək göstərmək məqsədilə yaradılıb.
Silikon Vadisi ilə ölkəmiz arasında bir körpü rolunu oynayan və ABŞ-da yaşayan azərbaycanlılar tərəfindən yaradılan startapları bir araya gətirən layihə yerli startapların qlobal bazara çıxarılması, onların beynəlxalq investorlara əlçatanlığını gücləndirməyi hədəfləyib.
“İnnovasiyalar Evi” Silikon Vadisində yaşayan azərbaycanlılar tərəfindən yaradılan startapları bir araya gətirir, eyni zamanda ölkəmizdəki startapçıların Silikon Vadisinə gəlmələrinə, təcrübə qazanmalarına və öz startaplarını inkişaf etdirmələrinə dəstək göstərir.
“Gələcək üçün bacarıqlar”
“Gələcək üçün bacarıqlar” gənclərin – tələbələrin öz potensiallarını kəşf etmələri və bazar ehtiyaclarına uyğun rəqəmsal və sahibkarlıq bacarıqlarını inkişaf etdirmələri üçün ehtiyaclara əsasən 3 mərhələli (kəşf et - inkişaf et (öyrən) – tətbiq et (layihələndir)) inkubasiya və müəllimlərin bu prosesdə yetişdirilməsi üzrə mentorluq proqramının inkişafı layihəsidir.
Layihənin məqsədi innovasiya sahəsində kadr potensialının artırılması, təhsildə innovasiya fəaliyyətinin dəstəklənməsi, innovativ ideyalarını inkişaf etdirmək üçün təhsil prosesində tələbələrə dəstək göstərilməsi və onların ölkəmizin texnoloji inkişafında önəmli rol oynayan ixtira sahəsinə yönləndirilməsidir.
Layihə universitetlərdə innovasiya mühitinin təşviqi və startaplar üçün dayanıqlı inkubasiya mühitinin, təşəbbüskarlıq və sahibkarlıq mədəniyyətinin inkişafinı, ideyası olan şəxslərin, startapların faydalanması üçün dayanıqlı mentorluq şəbəkəsinin formalaşmasını, universitetlərdə ideyaların texnoloji transferinə dəstək mexanizminin yaradılmasını, tələbələrlə biznesin real ehtiyaclarına əsaslanaraq praktiki icra proqramlarının və real işləmə məkanlarının təşkilini, biznes ehtiyaclarına uyğun universitetlərdə ideya, tədqiqat, mentorluq və startap layihələrinin inkişaf etdirilməsini və tələbələrin və müəllimlərin İnnoland, Silikon Vadisində yerləşən İnnovasiya evi kimi mərkəzlərin resurslarından və infrastrukturundan davamlı istifadəsinin təşkilini hədəfləyir.
StartupFest
StartupFest əsasən startapları əhatə edən, özündə startaplarla bağlı problemləri, onların həll yollarını ehtiva edən və bir neçə beynəlxalq lisenziyalı tədbiri birləşdirən festivaldır. Startaplara həsr olunan və Azərbaycanda ilk dəfə keçirilən “StartupFest”ə “TEDx”, “Techstars”, “Startup Weekend”, “Fintech”, “DevopsDays”, “FunBaku”, “Product Hunt Meetup” kimi beynəlxalq tədbirləri də daxil olub.
Layihənin məqsədi təcrübə mübadiləsinə imkan yaratmaqla regionda və Azərbaycanda startap ekosisteminin oyunçularını bir araya gətirmək, ekosistemin inkişafı və mövcud problemlərin həlli istiqamətində fikir mübadiləsi aparmaq, Azərbaycanı bu istiqamətdə regional mərkəzə çevirmək olub.
Gənc texnologiya sahibkarlarını, investorları, şirkətləri, dövlət strukturları, universitetlər, media və müxtəlif ölkələrdən gələn beynəlxalq qonaqları bir araya gətirən layihədə təcrübə mübadiləsi üçün fürsət yaratmaqla Azərbaycan ekosisteminə müsbət təsir göstərməyi hədəflənib.
Layihə COVID-19 pandemiyası ilə bağlı elan olunmuş xüsusi karantin rejimi zamanı tətbiq olunan məhdudiyyətlərlə əlaqədar dayandırılıb. Növbəti illərdə keçirilməsi nəzərdə tutulur.
“ASAN Həyat” Bahar Festivalı
“ASAN Həyat” Bahar Festivalı - “İnnovasiyalar Mərkəzi” MMC-nin təşkilatçılığı ilə hər il mart ayının ilk günlərindən etibarən “ASAN Həyat” komplekslərinin ərazisində keçirilir. Tədbirlərdə Novruz atributları və bahar əhval-ruhiyyəsini əks etdirən sərgilər, yerli şirkətlərin məhsullarından ibarət satış yarmarkası təşkil olunur, həmçinin bölgələrimizdə yaşayan müxtəlif xalqların milli-mənəvi dəyərləri, folkloru, musiqi və mətbəxi nümayiş etdirilir.
Layihənin məqsədi xalqımızı tarixən bütövləşdirən, milli mədəniyyətimizi və mənəvi dəyərlərimizi özündə əks etdirən Novruz ənənələrini layiqincə yaşatmaq, regionlarda yaşayan əhalimizin sosial mədəni həyatına, bayram əhval-ruhiyyəsinin artırılmasına töhfə vermək, müxtəlif xalqların milli-mənəvi dəyərlərini, folklorunu, musiqi və mətbəxini nümayiş etdirmək, insanlar arasında birlik və mehribanlığı möhkəmləndirmək və müsbət imic formalaşdırmaqdır.
Festival ilk dəfə 2019-cu ildə 2 – 19 mart tarixində Masallı, Şəki və Quba “ASAN Həyat” komplekslərində keçirilib.
Növbəti festival 2020-ci ildə 1-3 mart tarixində Kürdəmir “ASAN Həyat” kompleksində “ASAN Həyat” Bahar Festivalı keçirilib.
Layihə COVID-19 pandemiyası ilə bağlı elan olunmuş xüsusi karantin rejimi zamanı tətbiq olunan məhdudiyyətlərlə əlaqədar dayandırılıb. Növbəti illərdə keçirilməsi nəzərdə tutulur.