Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” 1 İyun – Uşaqların Beynəlxalq Müdafiəsi Günü ilə əlaqədar sosial təşəbbüs reallaşdırıb.

Təşəbbüs çərçivəsində Heydər Əliyev Beynəlxalq Aeroportunda ölkəyə gələn xarici qonaqları “ASAN Viza” əməkdaşları əvəzinə uşaqlar qarşılayıblar.

Məqsəd uşaqlar üçün bu əlamətdar gündə xoş təəssürat və sevincli anlar yaşatmaq, yaddaqalan təcrübə əldə etmələrinə dəstək olub.

Xarici qonaqlar uşaqlar tərəfindən ölkəmizin mədəniyyəti, qonaqpərvərliyi və digər istiqamətlərdə məlumatlandırılıblar.

Bu təşəbbüs “ASAN xidmət” brendinin sosial məsuliyyət tədbirlərinə önəminin artırılması, həm də ölkəmizdə multikulturalizm və tolerantlıq dəyərlərinin təbliği istiqamətində atılan növbəti addımdır.

Xatırladaq ki, Azərbaycan Respublikasının Prezidenti İlham Əliyevin 1 iyun 2016-cı il tarixli Fərmanı əsasında yaradılan “ASAN Viza” sisteminin idarəedilməsi Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyi tərəfindən həyata keçirilir.

“ASAN Viza” www.evisa.gov.az elektron viza portalı vasitəsilə və Azərbaycan Respublikasında yerləşən beynəlxalq hava limanlarında vizaların verilməsi istiqamətləri üzrə fəaliyyət göstərir.

“ZİRVƏ – Zəfər idarəçisinin rəhbərlik vizyonu və ənənələri” layihəsinin açılış mərasimi keçirilib. 

Layihə Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovativ İnkişaf Mərkəzi tərəfindən reallaşdırılır.

Məqsəd Prezident İlham Əliyevin zəfər siyasətinin idarəetmə və liderlik sahəsində tətbiqini müzakirə etmək və bu siyasətdən ilham alan işgüzar şəxslərin bilik və bacarıqlarını artırmaqdır.

Öncə Ulu Öndər Heydər Əliyevin və şəhidlərimizin əziz xatirəsi bir dəqiqəlik sükutla yad edilib, Azərbaycan Respublikasının Dövlət Himni səsləndirilib.
Mərasimdə Dövlət Agentliyinin sədri Ülvi Mehdiyev və Milli Məclis sədrinin birinci müavini Əli Əhmədov çıxış ediblər.

Rəsmilər əsası Ulu Öndər Heydər Əliyev tərəfindən qoyulan dövlət quruculuğu siyasətinin bu gün Prezident İlham Əliyev tərəfindən özünün ən dinamik dövrünü yaşadığını qeyd ediblər. Diqqətə çatdırılıb ki, Azərbaycan Prezidentinin idarəetmə sahəsində həyata keçirdiyi tədbirlər və çoxşaxəli islahatlar ölkəmizin tərəqqisinə əsaslanıb.

Tədbirdə Prezident İlham Əliyevin Zəfər siyasətinə həsr olunmuş, idarəetmə və liderlik mövzusunu əhatə edən eyni zamanda ASAN İnnovativ İnkişaf Mərkəzinin fəaliyyətinə dair videoçarxlar nümayiş etdirilib, təqdimat baş tutub. 

Sonra “İdarəetmədə yeni çağırışlar” mövzusunda panel müzakirələr reallaşdırılıb. 

Layihəyə əsasən 6 may - 6 iyul 2025-ci il tarixində müxtəlif dövlət və özəl sektordan olan 150 rəhbər şəxs “Dövlət rəsmiləri ilə təcrübə mübadiləsi” görüşlərində və “İdarəetmədə innovativ liderlik bacarıqları” mövzularında təlimlərdə, "ASAN xidmət" təcrübəsi ilə tanışlıq tədbirlərində iştirak edəcək. Həmçinin işğaldan azad edilmiş ərazilərə infoturlar təşkil ediləcək və “Təəssüratlar toplusu” onlayn kitabı nəşr olunacaq.

Sponsorlar: Veyseloglu Group of Companies , PAŞA Kapital İnvestisiya Şirkəti
Tərəfdaşlar: Bashkent Restoran və Şirniyyat Evi, ASAN Könüllüləri Təşkilatı
Media tərəfdaşı: ASAN Radio/TV

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin direktoru Vüsal Rüstəmov “Türkiyə Texnologiya Komandası” - T3 Fondunun dəvəti ilə Şimali Kipr Türk Respublikasında keçirilən “TEKNOFEST” aerokosmik və texnologiya festivalında iştirak edib.

Vüsal Rüstəmov festivalda finala yüksələn və ölkəmizi təmsil edən komandalarla bir araya gəlib, onların uğurlarını təqdir edib və hər bir iştirakçını səmimiyyətlə təbrik edib. O, xüsusilə Bakı Ali Neft Məktəbinin (BANM) komandaları ilə də tanış olub, onların uğurlu çıxışlarını yüksək dəyərləndirib. Komandaların göstərdiyi əzmkarlığı yüksək qiymətləndirən Mərkəz rəhbəri, gənclərin bu sahədə əldə etdiyi uğurların Azərbaycanın texnoloji inkişafına mühüm töhfə verdiyini bildirib. O, qalib komandaları yeni zirvələrə doğru inamla addımlamağa və beynəlxalq platformalarda ölkəmizi daha geniş şəkildə təmsil etməyə çağırıb.

Qeyd edək ki, Dövlət Agentliyi ilə Türkiyə Texnologiya Komandası Fondu (T3) arasında imzalanmış Protokola əsasən yaradılan “Bilim Bakı” Mərkəzi “TEKNOFEST”in Azərbaycandakı koordinatorudur. Belə ki, festivalda ölkəmizi təmsil edən universitet tələbələri, gənclər və şagirdlərdən ibarət komandalar  müxtəlif mərhələlər üzrə hazırlıq prosesini bu mərkəzdə keçiblər. Mərkəz onlara texniki və nəzəri biliklərin artırılmasında dəstək göstərərək, startapların beynəlxalq səviyyədə rəqabətə hazırlaşmasına töhfə verib.

2018-ci ildən etibarən təşkil olunan "TEKNOFEST" innovasiya, startap və texnologiya sahəsində dünyanın ən qabaqcıl tədbirlərindən hesab olunur. Festivalın keçirilməsinin əsas məqsədlərindən biri gənclərin qeyd olunan sahələrə diqqətinin cəlb olunması və müvafiq istiqamətlər üzrə inkişafı təmin etməkdir.

11-12 dekabr 2024-cü il tarixində  Türkiyənin İstanbul şəhərində  “Take Off İstanbul” startap sammiti  baş tutub.

Türkiyə Texnologiya Komandası Vəqfinin (T3 Vəqfi), Türkiyənin Sənaye və Texnologiya Nazirliyinin və Prezident İnvestisiya İdarəsinin birgə təşkilatçılığı ilə keçirilən  sammit sahibkarlıq mühitini gücləndirmək məqsədini daşıyır.

Tədbirdə "ASAN xidmət"in “İNNOLAND” İnkubasiya və Akselerasiya Mərkəzinin rezidentləri olan “Savafy.org”, “Taskool” və “KidFi”,  “Gələcək üçün bacarıqlar” layihəsinin “Vooshi”,  “Medappoint”, həmçinin  “Glorri” yerli startapı innovativ həlləri və texnologiyaları ilə ölkəmizi təmsil ediblər. Onlar investorlarla və ekosistemin əsas oyunçuları ilə tanışlıq imkanı əldə ediblər.

“İnnovasiyalar Mərkəzi”nin direktoru Vüsal Rüstəmov "Baykar” şirkətinin texniki direktoru Selçuk Bayraktara  burada təqdim olunan innovativ layihələr barədə məlumat verib. Selçuk Bayraktar startapların fəaliyyətini yüksək qiymətləndirib və onlara uğurlar arzulayıb.

Tədbir çərçivəsində  Türk İnvestisiya Fondu, "Yandex", "Al Baraka", "Sglobe.co", T3 Vəqfi, "ODTÜ Teknokent", "Havelsan", "Bilişim Vadisi" və bir çox vençur fondlarla da görüşlər keçirilib və mümkün əməkdaşlıq perspektivləri müzakirə edilib.

Beynəlxalq startap sammiti olan "Take Off" innovasiya üçün maneəsiz mühit yaratmaq məqsədilə sahibkarları, mentorları, vençur kapitalı təmsilçilərini və şirkətləri bir araya gətirir.

Sammit sahibkarların innovativ layihələrini təqdim etmələri, investorlarla birbaşa əlaqə qurmaları, sənaye liderlərindən ilham almaları və yeni biznes imkanları yaratmaları üçün unikal fürsətlər yaradır.

Bu günə qədər 100-dən çox ölkədən 801 startapı, 412 mentoru və investoru, 166 məruzəçini bir araya gətirən və ümumilikdə 755 min dollarlıq mükafat fondu təqdim edən “Take Off İstanbul” sahibkarlıq ekosisteminin inkişafına həsr olunmuş qlobal miqyaslı qeyri-kommersiya tədbiridir.

27 noyabr tarixində Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin "İnnovasiyalar Mərkəzi" ölkənin ən böyük PR Forum 2024-ün rəsmi tərəfdaşı kimi çıxış edib.

ICESCO-nun Strateji Planlaşdırma və Mükəmməllik üzrə Direktoru Sally Mabrouk Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin nəzdində fəaliyyət göstərən “İnnovasiyalar Mərkəzi”nin qonağı olub.

Sally Mabrouk ölkəmizə “Birləşmiş Millətlər Təşkilatının İqlim Dəyişmələri üzrə Çərçivə Konvensiyası”nın Tərəflər Konfransının 29-cu sessiyası (#COP29) çərçivəsində səfər edib.

“İnnovasiyalar Mərkəzi”nin Direktoru Vüsal Rüstəmov qonağa Mərkəzin fəaliyyəti, həyata keçirilən layihələr və innovativ həllər barədə ətraflı məlumat verib.

Görüş zamanı, həmçinin tərəflər arasında innovasiya, kadr hazırlığı istiqamətində müzakirələr edilib. Eyni zamanda, gələcəkdə həyata keçirilə biləcək ortaq təşəbbüslərlə bağlı fikir mübadiləsi aparılıb.

Tədbir Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin və “Yeni Texnologiyaların İnkişafına Dəstək” İctimai Birliyinin təşəbbüsü ilə təşkil olunub.

Mərasimdə Milli Məclisin deputatları Fariz İsmayılzadə və Ülviyyə Ağayeva, “Yeni Texnologiyaların İnkişafına Dəstək” İctimai Birliyinin sədri Ceyhun Xəlilov, “YAŞAT” Fondunun rəhbəri Elvin Hüseynov, festival iştirakçıları və digər qonaqlar iştirak ediblər.

Tədbir şəhidlərimizin əziz xatirəsinin bir dəqiqəlik sükutla yad edilməsi və Azərbaycan Respublikasının Dövlət Himninin səsləndirilməsi ilə başlayıb.

Tədbir zamanı “Yeni üfüqlərə doğru” şüarı ilə üçüncü dəfə keçirilən Aerokosmik Modelçilik Festivalına dair videoçarx nümayiş olunub, bu ilki yarışların nəticələri və yeniliklər barədə məlumat verilib. Bildirilib ki, festival iki turdan ibarət olub və ümumilikdə 10 növ üzrə yarışlar, aviaşou, kvadrokopter və təyyarə modellərinin nümayişi keçirilib.

Festival çərçivəsində təşkil olunan 10 növdə ("S-3-B Paraşüt", "S-3-C Paraşüt", "S-4-D Raketaplan", "S-6-A Streamer", "S-6-B Streamer", "S-6-C Streamer" və ilk dəfə olaraq "Peyk (CubeSat)", "Startap" (aerokosmik sahədə), dron və təyyarə modelləri) yarışlar üzrə Mükafatlandırma mərasimində I, II və III yerlərin sahibləri ilə yanaşı, festivalda aktiv iştirak edən yarışçılara da sertifikatlar təqdim olunub.

Festivalda “YAŞAT” Fondunun dəstəyi ilə Raket modelçiliyi yarışının “S-6-A Streamer” kateqoriyasında bir araya gələn 5 şəhid övladı da qaliblər sırasında olub.  

Sonda təşkilatçı və tərəfdaş qurumların nümayəndələrinə — “İnnovasiyalar Mərkəzi”, Daxili İşlər Nazirliyi, Fövqəladə Hallar Nazirliyi, Xəzər Rayon İcra Hakimiyyəti, Qeyri-Hökumət Təşkilatlarına Dövlət Dəstəyi Agentliyi, Hava Nəqliyyatı Baş Gömrük İdarəsi, İnnovasiya və Rəqəmsal İnkişaf Agentliyi, “Azərkosmos”, Milli Aviasiya Akademiyası, “Hədəf STEAM Liseyi”, “IT INNOVATIONS computer academy”, “Nərgiz” Klinikası, “AzST”, “OUTSITE” və “RC CARTING” şirkətlərinə dəstəklərinə görə təşəkkürnamələr təqdim edilib.

Festivalın əsas məqsədi ölkəmizdə raket və peyk modelçiliyinin inkişafına, gənclərin innovativ düşüncə tərzinin formalaşmasına, sağlam həyat tərzinin təşviqinə və texniki yaradıcılığın kütləviləşməsinə dəstək olmaqdır.

Təmiz havada intellektual aktivliklə fiziki fəaliyyəti birləşdirən bu idman növü iştirakçılara həm fərdi, həm də komanda şəklində yarışmaq imkanı yaradıb. Qiymətləndirmə zamanı uçuşun hündürlüyü və müddəti, enişin dəqiqliyi, modellərin texniki səviyyəsi və uçuş reallığı əsas meyarlar kimi götürülüb.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi” ilə “Bayraktar Teknoloji Azərbaycan” MMC arasında əməkdaşlığa dair Anlaşma Memorandumu imzalanıb.

Memorandumu “İnnovasiyalar Mərkəzi”nin direktoru Vüsal Rüstəmov və “Bayraktar Teknoloji Azərbaycan” MMC-nin direktoru Hüseyin Topuz imzalayıblar.

Memorandum çərçivəsində tərəflər elm, innovasiya və süni intellekt sahələrində birgə layihələr, tələbə təcrübə proqramları reallaşdıracaq, elmi tədqiqatlarda əməkdaşlıq edəcəklər. Eləcə də kadr potensialının artırılması üçün təlim və seminarların reallaşdırılması, startapların dəstəklənməsi və “Demo Day” formatlı tədbirlər nəzərdə tutur.

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin təşkilatçılığı ilə “Bilim Bakı” mərkəzinin 2-ci “Deneyap” proqramının 3-cü modul şənliyi keçirilib.

"Bilim Bakı” mərkəzinin “Deneyap” texnologiya laboratoriyasının “Elektron proqramlama və əşyaların interneti” modulunun başa çatması münasibətilə gerçəkləşən tədbirdə Dövlət Agentliyinin “İnnovasiyalar Mərkəzi”nin direktoru Vüsal Rüstəmov, “Bilim Bakı” Mərkəzinin rəhbəri Ahmet Köse, Türkiyənin Azərbaycandakı Təhsil müşaviri Yurdagül Aydoğan, laboratoriyanın şagirdləri və onların valideynləri iştirak ediblər.

Tədbirdə 20-yə yaxın komanda “Elektron proqramlama və əşyaların interneti” dərsləri əsasında "Ağıllı ev" layihəsinin prototiplərini təqdim edib. Komandalar “Bilim Bakı” mərkəzinin müəllimləri və mütəxəssislərdən ibarət 3 nəfərlik münsiflər heyəti tərəfindən qiymətləndiriliblər. Nəticəyə əsasən 5-6 cı siniflər üzrə I yeri “X”, II yeri “Smart boys”, III yeri “Cuboid” komandaları, 7-8 ci siniflər üzrə isə I yeri “Neo Hive”, II yer “İnvictis”, II yeri “Smart home group” komandaları tutublar.

Sonda şagirdlərə “Elektron proqramlama və əşyaların interneti” modulunu uğurla başa vurduqlarına görə sertifikatlar təqdim olunub və xatirə fotosu çəkilib.

2-ci “Deneyap” proqramına şagird seçimi imtahanı 2 mərhələdən ibarət olub. 1-ci mərhələ olan yazılı imtahanda iştirak edən Bakı şəhərinin ümumtəhsil orta məktəblərinin 4, 5, 6, 7-ci sinfini bitirən 5000-ə yaxın şagird arasından ən çox bal toplayan 431 şagird 2-ci mərhələ olan praktiki imtahanda iştirak edib. Hər iki mərhələdə ümumi olaraq ən yüksək nəticə göstərən 80 şagird 3 il müddətində “Deneyap” texnologiya laboratoriyasında təhsil almaq hüququ qazanıb.

Bakı şəhərinin Hövsan qəsəbəsində “Aerokosmik Modelçilik Festivalı 2025” keçirilib.

Tədbir Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin “İnnovasiyalar Mərkəzi”nin və “Yeni Texnologiyaların İnkişafına Dəstək” İctimai Birliyinin təşəbbüsü ilə gerçəkləşdirilib.

Əsas məqsəd ölkəmizdə raket və peyk modelçiliyinin inkişafına, gənclərin innovativ düşüncə tərzinin formalaşmasına, sağlam həyat tərzinin təşviqinə və texniki yaradıcılığın kütləviləşməsinə dəstəkdir.

Təmiz havada intellektual aktivliklə fiziki fəaliyyəti birləşdirən bu idman növü iştirakçıların həm fərdi, həm də komanda şəklində yarışmasına şərait yaradır. Qiymətləndirmə zamanı uçuşun hündürlüyü və müddəti, enişin dəqiqliyi, modellərin texniki səviyyəsi və uçuş reallığı əsas götürülür.

Üçüncü dəfədir təşkil olunan festival iki mərhələdə, 10 növ yarış ("S-3-B Paraşüt", "S-3-C Paraşüt", "S-4-D Raketaplan", "S-6-A Streamer", "S-6-B Streamer", "S-6-C Streamer" və ilk dəfə olaraq "Peyk (CubeSat)", "Startap" (aerokosmik sahədə), dron və təyyarə modelləri) üzrə təşkil olunub. Həmçinin intellektual müsabiqə və aviaşou xarakterli helikopter və təyyarə modellərinin nümayişi də gerçəkləşib. İştirakçılara bu çərçivədə aerodinamika, aerokosmik mühəndislik, elektronika və mexanika sahəsində biliklərini praktik formada tətbiq üçün də geniş imkanlar yaradılıb.

Bu ilki festivala “YAŞAT” Fondunun dəstəyi ilə 5 şəhid övladı da qatılıb. Raket modelçiliyi yarışının “S-6-A Streamer” kateqoriyasında bir araya gələn komanda üzvləri öncəki müddətdə festivala hazırlıq məqsədilə Fond tərəfindən raket, paraşüt, dron, təyyarə və s. modellərinin təlim məşqlərinə cəlb olunublar.

Festivalda bu il ilk dəfə raket modelçiliyi üzrə beynəlxalq FAI standartlarına uyğun S-4-D Raketaplan kateqoriyasında və peyk modelçiliyi (CubeSat) sahəsində yarışlar keçirilib. Həmçinin startaplar bu sahədə ideyalarını inkişaf və kommersiyalaşdırmaq məsədilə yarışda iştirak ediblər.

Tərəfdaşlar: Daxili İşlər Nazirliyi, Fövqəladə Hallar Nazirliyi, Xəzər Rayon İcra Hakimiyyəti, Qeyri-Hökumət Təşkilatlarına Dövlət Dəstəyi Agentliyi, Hava Nəqliyyatı Baş Gömrük İdarəsi, İnnovasiya və Rəqəmsal İnkişaf Agentliyi, Azərkosmos, Milli Aviasiya Akademiyası, Hədəf STEAM Liseyi, “IT INNOVATIONS computer academy”, Nərgiz klinikası, “AzST”, “OUTSITE” və “RC CARTING”

Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar üzrə Dövlət Agentliyinin ASAN İnnovativ İnkişaf Mərkəzinin təşkilatçılığı ilə keçirilən “ZİRVƏ” idarəçilik marafonunun ilk mövsümü yekunlaşıb. Zəfər qələbəmizin 5-ci ildönümündə və “Konstitusiya və Suverenlik İli”ndə keçirilən layihənin məqsədi Prezident İlham Əliyevin zəfər siyasətinin idarəetmə və liderlik sahəsində tətbiqini müzakirə etmək və bu siyasətdən ilham alan işgüzar şəxslərin bilik və bacarıqlarını artırmaqdır.

Marafon boyu iştirakçılar dövlət və özəl sektordan olan peşəkar mütəxəssislərlə bilik və təcrübə mübadiləsi aparıblar. Həmçinin Azərbaycan Respublikasının Minatəmizləmə Agentliyinin İdarə Heyətinin sədri Vüqar Süleymanov ilə xüsusi görüş təşkil olunub.

İlk mövsümdə 120 işgüzar şəxs "Zəfər idarəçisinin kinetik imici”, “Liderlik: etika və emosional zəka”, “High Tech, High Touch: Texnologiya və insan yönümlü liderlik”, "Gerçəklər ilə xəyallar arasında iş həyatı panoraması" mövzularında maarifləndirici təlimlərdə iştirak edib.

Layihə çərçivəsində “Dövlət rəsmiləri ilə təcrübə mübadiləsi” formatında görüşlər, “İdarəetmədə innovativ liderlik bacarıqları” üzrə təlimlər, “ASAN xidmət” modeli ilə tanışlıq tədbirləri, işğaldan azad edilmiş ərazilərə infoturlar təşkil olunacaq.

Növbəti mövsümə sentyabr ayında start veriləcək.

Sponsorlar: “Veysəloğlu” Şirkətlər Qrupu, PAŞA Kapital İnvestisiya Şirkəti

“Bilim Bakı” mərkəzinin təşkilatçılığı ilə 1 İyun – Uşaqların Beynəlxalq Müdafiəsi Günü ilə əlaqədar “Kiçik sahibkarlar, böyük hədəflər” adlı sosial-iqtisadi yönümlü maarifləndirmə layihəsi həyata keçirilib.

4–31 may 2025-ci il tarixini əhatə edən layihə “Bilim Bakı” mərkəzinin təşkilatçılığı, PAŞA Bankın və “YAŞAT” Fondunun dəstəyi ilə baş tutub.

Məqsəd uşaqların sahibkarlıq sahəsində bilik və bacarıqlarını artırmaq, onların yaradıcılıq, komanda işi və strateji düşüncə qabiliyyətlərinin inkişafına töhfə verməkdir.

Layihə şəhid ailələrinin və PAŞA Bank əməkdaşlarının 10–14 yaş arası övladları üçün təşkil edilib və onların sahibkarlıq bacarıqlarının inkişaf etdirilməsini hədəfləyib.

Təlimlərə 100 şagird cəlb olunub. “Bilim Bakı” mərkəzinin peşəkar təlimçi heyəti tərəfindən keçirilən dərslər zamanı iştirakçılara sahibkarlığın əsasları, struktur və növləri, brendin yaradılması və satış strategiyaları haqqında nəzəri və praktik biliklər verilib.

Uşaqlar təlimlər çərçivəsində komandalar şəklində çalışaraq brendlərini yaradıb, məhsullarına ad, loqo və sloqan təyin ediblər.

Ardınca bağlanış mərasimi keçirilib. Komandalar hazırladıqları məhsulları təqdim ediblər və münsiflər heyətinin qiymətləndirməsi ilə ilk 3 yerin sahibləri müəyyənləşib.

Qalib komandalar xüsusi hədiyyələrlə mükafatlandırılıblar.